Ադրբեջանի, Թուրքիայի, Ուզբեկստանի, Ղազախստանի և Պակիստանի հատուկ նշանակության ուժերը կանցկացնեն զորավարժություններ

Բաքվում տեղի է ունեցել «Անսահման եղբայրություն-IV» բազմազգ զորավարժությունների անցկացման պլանավորող խորհրդաժողով, որոնք այս տարվա սեպտեմբերին կանցկացվեն Ադրբեջանում՝ Ադրբեջանի, Թուրքիայի, Ուզբեկստանի, Ղազախստանի և Պակիստանի հատուկ նշանակության ուժերի մասնակցությամբ: Հաղորդում է APA-ն՝ վկայակոչելով պաշտպանության նախարարությունը։

Համաժողովի ընթացքում մասնակից երկրների հատուկ նշանակության ուժերի ներկայացուցիչները քննարկել են զորավարժությունների ընթացքը, կազմակերպչական հարցեր, ինչպես նաև պատասխանել են հետաքրքրություն ներկայացնող հարցերին: Հանդիպման ընթացքում Ուշադրության կենտրոնում են եղել հատուկջոկատայինների համատեղ օպերատիվ պատրաստության և նրանց միջև փոխգործակցության կազմակերպման հարցերը:

Քննարկվել են ադրբեջանա-թուրքական ռազմական համագործակցության զարգացման հեռանկարները։ Համաժողովում անդրադարձ է կատարվել նաև ռազմական համագործակցության և փորձի փոխանակման կարևոր ասպեկտներին: «Անսահման եղբայրություն-IV» բազմազգ զորավարժություններն ուղղված են մասնակից երկրների համատեղ օպերատիվ կարողությունների բարձրացմանը և տարածաշրջանային անվտանգության ամրապնդման գործում ներդրում ունենալուն: