«Չորրորդ ինքնիշխանություն». Ամենակատակասերը հայերն են

Թերթը գրում է. «Ըստ Gallup միջազգային սոցիոլոգիական ասոցիացիայի անցկացրած ուսումնասիրությունների, Հայաստանի բնակչության 70 տոկոսն իրեն երջանիկ է համարում: Հարցումն իրականացվել է 500 հայաստանցիների շրջանում՝ հեռախոսով:

«ՉԻ»- Միջազգային սոցիոլոգները հաստատ մեզ ձեռ են առել: Ինչպե՞ս կարող է բնակչության 70 տոկոսն իրեն երջանիկ համարել մի երկրում, որի բնակչության մոտ կեսը, պաշտոնական տվյալներով, աղքատ է, 45 տոկոսն էլ պատրաստ է առաջին իսկ հնարավորության դեպքում հեռանալ երկրից: Այնպես որ, այստեղ կարող է միայն մի բացատրություն լինել. միջազգային սոցիոլոգները երեւի հարցումն անցկացրել են բացառապես արմավիրցի ջահելության շրջանակներում՝ կանեփի առաջին բերքահավաքից կես ժամ անց: Կամ էլ՝ սոցիոլոգներն իրենք են տվյալներն ամփոփելուց առաջ մի թեթեւ օգտվել նրանց հյուրասիրությունից:

Իսկ ահա ԵՊՀ կիրառական սոցիոլոգիայի ամբիոնի վարիչը համոզված է, որ իրենց երջանիկ համարողների մեծ մասն այդ պատասխանը տվել է կատակով, նույնիսկ՝ հեգնանքով: Այսինքն՝ ստացվում է, որ Հայաստանի բնակչության 70 տոկոսը ոչ թե երջանիկ է, այլ կատակասեր: Իսկ իրականում Gallup-ի աշխատակիցներն են կատակասեր. բա լուրջ մարդը Հայաստանում ապրողներին այդպիսի հարց կտա՞»: