Ռուսաստանը հայտարարել է՝ պատրաստ է օգնել ԱՄՆ-ին և Իրանին միջուկային գործարքի հարցում

Ռուսաստանը պատրաստ է օգնություն ցուցաբերել Իրանին և ԱՄՆ-ին միջուկային ծրագրի շուրջ համաձայնության հասնելու համար։ Այս մասին հայտարարել է ՌԴ փոխարտգործնախարար Սերգեյ Ռյաբկովը, փոխանցում է РИА Новости-ն։

Դիվանագետը մանրամասնել է, որ Մոսկվան պատրաստ է ոչ միայն քաղաքական, այլև գործնական օգնություն ցուցաբերել։ Օրինակ՝ ռուսական կողմը կարող է օգնել Իսլամական Հանրապետության տարածքից միջուկային ավելցուկային նյութերի հեռացման հարցում՝ այդ նյութը հարմարեցնելու ռեակտորների համար վառելիքի արտադրությանը։

Հունիսի 4-ին ՌԴ նախագահի օգնական Յուրի Ուշակովը հայտարարել է, որ Ամերիկայի առաջնորդ Դոնալդ Թրամփը հնարավոր է համարում, որ Ռուսաստանը աջակցի ԱՄՆ-ի և Իրանի միջև բանակցություններին։ Նրա խոսքով, հեռախոսազրույցի ընթացքում ՌԴ և ԱՄՆ նախագահները քննարկել են ոչ միայն Ուկրաինան, այլև մի շարք միջազգային հարցեր՝ «շեշտելով Իրանի միջուկային ծրագրի շուրջ ԱՄՆ-ի և Իրանի միջև բանակցություններում որոշակիորեն փակուղային իրավիճակը»։