Կալիֆորնիայի բողոքի ակցիաները կազմակերպել են պրոֆեսիոնալները, ինչ-որ մեկը ֆինանսավորում է դրանք. Թրամփ (լուսանկարներ)

ԱՄՆ նախագահ Դոնալդ Թրամփը կարծում է, որ Կալիֆորնիայում բողոքի ակցիաները ֆինանսավորվում են ինչ-որ մեկի կողմից։ Քաղաքական գործիչը այս մասին ասել է Հյուսիսային Կարոլինայի Ֆորտ Բրեգ ռազմաբազայում զինվորականներին և վետերաններին, հայտնում է Սպիտակ տունը։

Թրամփի խոսքով՝ Կալիֆորնիայում տեղի ունեցած զանգվածային անկարգություններն ու բողոքները «լիամասշտաբ հարձակում են խաղաղության, հասարակական կարգի և Միացյալ Նահանգների ազգային ինքնիշխանության վրա, որոնք «իրականացվում են օտարերկրյա դրոշներ կրող խռովարարների կողմից»՝ նպատակ ունենալով շարունակել ներխուժումը ամերիկյան տարածք։

Նախագահն ընդգծել է, որ չի կարելի թույլ տալ, որ դա տեղի ունենա։ Նրա կարծիքով՝ բողոքի ակցիաները կազմակերպել են պրոֆեսիոնալները, ինչ-որ մեկը ֆինանսավորում է դրանք։

Թրամփը հավելել է, որ մտադիր է ԱՄՆ գլխավոր դատախազ Փամ Բոնդիի և Արդարադատության նախարարության միջոցով պարզել, թե «ով է ֆինանսավորում այս ամբողջ գործընթացները»։