Tesla-ն թողարկում է իր ռոբոտաքսին

Tesla-ն հունիսի 22-ին պատրաստվում է գործարկել իր երկար խոստացված ռոբոտաքսի ծառայությունը՝ սկսելով Թեքսասի Օսթին քաղաքից։ Այս մասին հայտնել է Իլոն Մասկը՝ հավելելով, որ անվտանգության նկատառումներից ելնելով ամսաթիվը դեռ կարող է փոխվել։ Նախնական փուլում ծառայությունը կգործի 10-20 Model Y էլեկտրամեքենաների միջոցով՝ սահմանափակ տարածքում և հեռավար հսկողությամբ։ Ըստ Մասկի, արդեն հունիսի 28-ից Tesla-ի մեքենաները կկարողանան գործարանի գծից ինքնուրույն հասնել գնորդի տուն՝ առանց վարորդի մասնակցության։

Ռոբոտաքսին դիտարկվում է որպես ընկերության նոր ռազմավարական առանցք այն պահից, երբ Tesla-ն հրաժարվեց էժանարժեք մոդել ստեղծելու ծրագրից։ Սակայն ծառայության մեկնարկը տեղի է ունենում էլեկտրամեքենաների պահանջարկի անկման, Մասկի քաղաքական ակտիվության քննադատության և շուկայի սաստիկ մրցակցության ֆոնին։

Չնայած տեխնիկական և իրավական մարտահրավերներին՝ ընկերությունը նախատեսում է մինչև տարեվերջ ծառայությունը տարածել նաև այլ նահանգներ՝ ներառյալ խիստ կարգավորվող Կալիֆորնիան։ Սակայն դեռևս մնում են մի շարք անպատասխան հարցեր՝ ինչպես կաշխատի համակարգը, ինչ կլինի վերահսկման մեխանիզմը և ինչպես հասարակությունը կկարողանա օգտվել նոր ծառայությունից, հայտնում է Reuters-ը։