Իսրայելական կրակը Գազայում խլել է 41 կյանք՝ ներառյալ՝ մարդասիրական օգնության կետում

Իսրայելի բանակի կրակից և օդային հարվածներից Գազայի հատվածում զոհվել է առնվազն 41 պաղեստինցի, որոնցից մեծ մասը՝ օգնության կետի մերձակայքում։ Տուժածների մեծ մասը սպանվել են Netzarim շրջանի մոտ գտնվող ամերիկյան աջակցությամբ գործող Gaza Humanitarian Foundation-ի սննդաբաշխման կետին մոտենալիս։ Ըստ տեղի բժիշկների՝ միայն այդ հատվածում սպանվել է առնվազն 25 մարդ, տասնյակներ էլ՝ վիրավորվել։

Իսրայելի պաշտպանության բանակը հայտնել է, որ "զգուշացնող կրակ է իրականացվել՝ զինվորներին մոտեցող և սպառնալիք ներկայացնող անձանց ուղղությամբ", սակայն շեշտել է, որ տարածքն ակտիվ ռազմական գոտի է։ Իսկ Գազայի առողջապահական նախարարության տվյալներով՝ օգնության կենտրոններին մոտենալու փորձի հետևանքով վերջին երկու շաբաթում արդեն զոհվել է 160-ից ավելի քաղաքացիական անձ։ ՄԱԿ-ն ու մի շարք միջազգային կառույցներ դատապարտել են սպանությունները և նշում են, որ Գազան սովի շեմին է։

Չնայած միջազգային միջնորդների՝ ԱՄՆ-ի, Եգիպտոսի և Քաթարի խաղաղության հաստատման ջանքերին, Իսրայելն ու ՀԱՄԱՍ-ը դեռևս մնում են հստակ պահանջների հակադիր բևեռներում։ Պատերազմը, որն սկսվել է 2023-ի հոկտեմբերի 7-ին, երբ ՀԱՄԱՍ-ը հարձակվեց Իսրայելի վրա, արդեն ավելի քան 55,000 պաղեստինցու կյանք է խլել՝ մեծամասամբ քաղաքացիական բնակչությունից, հայտնում է Reuters-ը։