Ինը հարազատ կորցրած փոքրիկ Ադամը տեղափոխվում է Միլան

Մի խումբ պաղեստինցիներ, այդ թվում՝ 11-ամյա Ադամ ալ-Նաջջարը, ով մայիսին Իսրայելի հարվածի հետևանքով կորցրել է իր ինը եղբայրներին և քույրերին, այս շաբաթ տեղափոխվում են Իտալիա՝ բուժում ստանալու նպատակով։ Այդ մասին հայտնել է Իտալիայի արտաքին գործերի նախարար Անտոնիո Տայանին։

Տղան, ում ձախ ձեռքը կոտրված և նյարդերը վնասված են, կտեղափոխվի Միլանի Նիգուարդա հիվանդանոց։ Մյուս վիրավորները կտեղափոխվեն Բերգամո և Հռոմ։

Իտալիա ժամանող խմբում ընդգրկված են 17 վիրավորներ և նրանց ուղեկցող 52 անձ։ Ադամի հայրը՝ բժիշկ Համդի ալ-Նաջջարը, մահացել է հարձակմանից մեկ շաբաթ անց, իսկ մայրը՝ մանկաբույժ Ալաա ալ-Նաջջարը, այժմ տղայի կողքին է։

ՄԱԿ-ի մանկական հիմնադրամի տվյալներով՝ Գազայի պատերազմում վերջին երկու տարվա ընթացքում սպանվել է ավելի քան 15,000 երեխա, և վիրավորվել՝ շուրջ 34,000-ը, հայտնում է Reuters-ը։