Նա մահացավ ոստիկանի ձեռքով.Բողոքներ են բարձրացել բլոգերի մահից հետո

Քենիայի նախագահ Վիլյամ Ռուտոն հաստատել է, որ բլոգեր Ալբերտ Օջվանգի մահը տեղի է ունեցել «ոստիկանների ձեռքից»՝ կոչ անելով չդատել վաղաժամ, մինչ շարունակվում է հետաքննությունը։ Օջվանգը, ով գրել է քաղաքական և սոցիալական թեմաներով, ձերբակալվել էր երկրի փոխոստիկանապետին վարկաբեկելու մեղադրանքով։ Ոստիկանությունը պնդում է, թե նա մահացել է, երբ գլխով հարվածել է բանտախցի պատին, սակայն դատաբժշկական փորձաքննությունը վկայում է՝ նա ենթարկվել է բռնության։

Բլոգերի մահը վրդովմունք է առաջացրել Քենիայում, որտեղ իրավապահների ձեռքով սպանությունները և անհետացումները դարձել են տարածված երևույթ։ Անկախ ոստիկանության վերահսկողության մարմինը՝ IPOA-ն, նշել է, որ Օջվանգը բերման էր ենթարկվել արևմտյան Քենիայի Հոմա Բեյ շրջանում և տեղափոխվել Նայրոբիի կենտրոնական ոստիկանական բաժին, որտեղ էլ նա մահացել է։ Փորձաքննությունը ցույց է տվել գլխի վնասվածքներ, պարանոցի սեղմում և փափուկ հյուսվածքների վնասում։

Նախագահ Ռուտոն այս դեպքը անվանել է «սրտաճմլիկ և անընդունելի», իսկ Ներքին գործերի նախարարը խոստացել է՝ բոլոր մեղավորները կբերվեն պատասխանատվության։ Մահվան փաստը լայն արձագանք է գտել իրավապաշտպան կառույցների շրջանում, իսկ մայրաքաղաքի դիահերձարանի առջև տեղի են ունեցել բողոքի ցույցեր։