Ադրբեջանական մամուլը գոհ է՝ Պաշտոնական Երևանն անձամբ է հարձակվում Էջմիածնի վրա

Ադրբեջանական լրատվամիջոցները վերջին օրերին մեծ ոգևորությամբ լուսաբանում են Նիկոլ Փաշինյանի և նրա կնոջ՝ Աննա Հակոբյանի քննադատական ու վիրավորական գրառումները՝ ուղղված Հայ Առաքելական Եկեղեցուն և հոգևորականներին։ Ադրբեջանական մամուլում դրանք ներկայացվում են որպես հակակշիռ՝ Էջմիածնի քաղաքական ազդեցությանը՝ միաժամանակ ակնարկելով, որ Փաշինյանը փորձում է ազատվել եկեղեցական ճնշումից և վերահսկել կրոնական հաստատությունները, ։

Ադրբեջանական տարբեր կայքեր՝ Vesti.az, Minval.az, Haqqin.az և Caliber.az, իրենց հոդվածներում ոչ միայն մանրամասն ներկայացնում են Փաշինյանի հարձակումները, այլև դրանք կապում են նրա ներքաղաքական թուլության ու պառակտվածության հետ՝ պնդելով, որ վարչապետի այս հռետորաբանությունը «բոնուս է Բաքվի համար»։ Մասնավորապես, շեշտվում է, որ կառավարության ղեկավարը փորձում է վերացնել եկեղեցու «կեղծ հեղինակությունն» ու ազդել Ամենայն Հայոց Կաթողիկոսի ընտրության մեխանիզմի վրա։

Հայաստանում ընդդիմադիր քաղաքական ու հոգևոր շրջանակները արձագանքել են խստորեն։ Հայ քաղաքական գործիչները շեշտել են, որ վարչապետի հայտարարությունները փաստացի աջակցություն են ադրբեջանական քարոզչությանը։ Ներկայումս վերլուծաբանները զգուշացնում են, որ նման քայլերը կարող են խորը ճգնաժամ առաջացնել ոչ միայն պետականության, այլև ազգային ինքնության առանցքային ինստիտուտների միջև։