Նաթանզի գործարանի վերգետնյա հատվածը, որտեղ Իրանը հարստացված ուրան էր արտադրում, ոչնչացվել է. ԱԷՄԳ

Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսին հայտարարել է, որ Նաթանզի գործարանի վերգետնյա հատվածը, որտեղ Իրանը մինչև 60% հարստացված ուրան էր արտադրում, ոչնչացվել է, ինչպես նաև տարածքում տեղակայված էլեկտրական ենթակառուցվածքները։

Նա նշել է, որ Իրանը հաստատել է՝ այսօրվա հարձակումների ժամանակ սկզբնապես հարված է հասցվել միայն Նաթանզի վառելիքի հարստացման գործարանին։

«Նատանզում ոչնչացվել է փորձնական գործարանի վերգետնյա մասը, որտեղ Իրանը արտադրում էր մինչև 60% հարստացված ուրան (ուրան-235 իզոտոպի պարունակությունը): Տեղանքի էլեկտրական ենթակառուցվածքները՝ բաշխիչ ենթակայանը, գլխավոր էլեկտրամատակարարման շենքը, արտակարգ էլեկտրամատակարարման համակարգը և պահեստային գեներատորները նույնպես ոչնչացվել են», -ըստ РИА Новости-ի՝ հայտարարել է Գրոսին՝ առցանց ելույթ ունենալով ՄԱԿ-ի Անվտանգության խորհրդի նիստում:

Գործակալության գլխավոր տնօրենը հավելել է, որ ցենտրիֆուգների կասկադներով ստորգետնյա օբյեկտի վրա ֆիզիկական հարձակման որևէ նշան չկա, որտեղ տեղակայված են փորձարարական և հիմնական վառելիքի հարստացման գործարանի մասերը։

«Այնուամենայնիվ, կասկադների էլեկտրաէներգիայի անջատումը կարող էր վնասել այնտեղ տեղակայված ցենտրիֆուգները», -նշել է Գրոսին։

news.am