Ինչո՞ւ յոթ տարի անց «հիշեցին» Հովիկ Աբրահամյանին. «Փաստ»

«Փաստ» օրաթերթը գրում է.

Երեկ հայտնի դարձավ, որ ՀՀ հակակոռուպցիոն կոմիտեում քննվող քրեական վարույթի շրջանակներում ձերբակալվել է Ազգային ժողովի նախկին նախագահ, նախկին վարչապետ Հովիկ Աբրահամյանը։ Սոցցանցերում բազմաթիվ օգտատերերի առաջին արձագանքն այն է, որ առաջիկա ընտրություններից առաջ այսպիսի շոուների պակաս չի լինելու:

Ավելին, կան տեղեկություններ, որ Հովիկ Աբրահամյանի հետ կապված այս շոուն նպատակ է ունեցել ևս մի քանի օր «զբաղեցնել» հանրությանը, բայց Նիկոլ Փաշինյանի պլանները խափանեց Իրան-Իսրայել հակամարտությունը, որը գրավեց բոլորի ուշադրությունը:

Ինչո՞ւ շոու: Որովհետև ակնհայտ է, որ սա ընտրություններից առաջ հասարակությանը գլխավոր թեմաներից շեղելու, «կոռուպցիոն» թեմաներով սեփական փոքրաթիվ ընտրազանգվածին ոգևորելու նպատակ ունի: Ի վերջո, իշխանափոխությունից անցել է յոթ տարի, և հանկարծ հիմա նրան «հիշեցին», երբ երկիրը լուրջ մարտահրավերների առջև է, երբ կան անվտանգային լուրջ խնդիրներ, երբ տնտեսությունը փլուզված է, իսկ առջևում հավանական նոր ռիսկեր կան, ու Նիկոլ Փաշինյանը փորձում է փրկել իր՝ շրիշակից ցածր վարկանիշն ու իր քարոզչական հին, մաշված գործիքակազմով իր կողքը պահել նրանց, ովքեր դեռ հավատում են այդ սկավառակներին ու տենչում են նորանոր «դատավարություններ», իսկ ավելի ստույգ՝ շոուներ: Իսկ ինչո՞ւ հենց Հովիկ Աբրահամյանը: Նախ՝ նշենք, որ, մեր տեղեկություններով, նա միակը չի լինելու: Առաջիկայում էլի կլինեն նոր «տեսարաններ», ու նոր գործեր «կսարքվեն» նրանց դեմ, ովքեր այս ընթացքում չեն խոնարհվել Նիկոլի առջև, չեն անցել նրա «թրի տակով», ընդհակառակը՝ եղել են պետության, պետականության, ազգայինի ջատագով, ինչն այդքան անհանգստացնում է Նիկոլ Փաշինյանին: