Թեհրանը չի ձգտում Իսրայելի հետ հակամարտությունն ընդլայնել տարածաշրջանային մակարդակով․ Իրանի ԱԳ նախարար

Իրանի արտաքին գործերի նախարար Աբբաս Արաղչին հայտարարել է, որ Թեհրանը չի ձգտում Իսրայելի հետ հակամարտությունն ընդլայնել տարածաշրջանային մակարդակով, եթե նման պատերազմ չպարտադրվի։ Նա այս մասին ասել է օտարերկրյա դեսպանների հետ հանդիպման ժամանակ, որը հեռարձակվել է պետական ​​հեռուստատեսությամբ։

«Մենք չենք ցանկանում այս պատերազմը ընդլայնել այլ երկրների կամ տարածաշրջանի տարածքում, եթե այն մեզ չպարտադրվի», - ընդգծել է Արաղչին։

Նրա խոսքով՝ Իսրայելի կողմից Իրանի վրա ուրբաթ օրը կատարված հարվածները, որոնք տեղի են ունեցել Թեհրանի և Վաշինգտոնի միջև միջուկային բանակցությունների ժամանակ, երկխոսությունը խաթարելու բացահայտ փորձ էին։

«Ակնհայտ է, որ սիոնիստական ​​ռեժիմը չի ցանկանում որևէ համաձայնագիր միջուկային հարցի շուրջ։ Այն չի ցանկանում բանակցություններ և դիվանագիտություն», - ասել է Արաղչին։

Նրա խոսքով՝ բանակցային գործընթացի ընթացքում Իրանի վրա հարձակումը հստակ ցույց է տալիս Իսրայելի թշնամանքը երկխոսության ցանկացած ձևի նկատմամբ։

Իրանցի նախարարը նշել է, որ Իրանի պատասխան հարվածները ուղղված էին Իսրայելի ռազմական և տնտեսական ենթակառուցվածքներին, միաժամանակ քննադատելով իրանական նավթաքիմիական օբյեկտների վրա հարվածները՝ դրանք անվանելով վտանգավոր՝ տարածաշրջանի այլ երկրներին հակամարտության մեջ ներքաշելու հնարավորության առումով։