Նեթանյահուի վարչակազմը դարձել է կայունության և անվտանգության համար գլոբալ խնդիր․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ Իրանի հետ միջուկային վեճը լուծելու միակ ճանապարհը բանակցություններն են։

Էրդողանը հեռախոսազրույց է ունեցել Օմանի սուլթան Հայսամ բին Թարիք Ալ Սաիդի հետ։

Զրույցի ընթացքում քննարկվել են Իսրայելի և Իրանի միջև հակամարտությունը, տարածաշրջանային և համաշխարհային հարցեր։

«Նախագահ Էրդողանն ասել է, որ հակամարտությունները, որոնք սկսվել են Իսրայելի կողմից Իրանի վրա հարձակումից հետո, մեծ վտանգ են ներկայացնում տարածաշրջանի համար, և որ տարածաշրջանը երբեք չի հանդուրժի ևս մեկ պատերազմ։

Նախագահն ասել է, որ (Իսրայելի վարչապետ Բենիամին Նեթանյահուի - խմբ.) վարչակազմը դարձել է կայունության և անվտանգության համար գլոբալ խնդիր, որ հարձակումները տեղի են ունեցել միջուկային բանակցությունների վեցերորդ փուլի նախօրեին, և որ Թուրքիան բանակցությունները համարում է միջուկային վեճը լուծելու միակ ճանապարհը։ Նախագահ Էրդողանը նաև ասել է, որ չպետք է թույլ տալ, որ վերջին իրադարձությունները ստվերեն Իսրայելի կողմից Գազայում իրականացված ցեղասպանությունը», - հայտնել է Թուրքիայի ղեկավարի գրասենյակը։