2024-ը Հայաստանի համար տնտեսական աճի կայունացման ժամանակահատված էր. ֆինանսների նախարար

Խորհրդարանը քննարկում է ՀՀ 2024 թվականի պետական բյուջեի կատարման տարեկան հաշվետվությունը:

ՀՀ ֆինանսների նախարար, հիմնական զեկուցող Վահե Հովհաննիսյանը իր ելույթում ընդգծեց՝ բյուջեն մեր բոլորի մասին է, ՀՀ-ում ապրող յուրաքանչյուր մարդու մասին: ՀՀ-ում չկա գոնե մեկ մարդ, որը հարկ չի վճարում՝ անհնարին է: 

Նրա խոսքով՝ բյուջեն ձևավորվում է մեր բոլորի համատեղ ջանքի արդյունքում, և որքան շատ ենք վաստակում ու սպառում, այնքան մեծ է մեր ներդրումը բյուջեի եկամտային մասի ձևավորման մեջ: «Հարստացի՛ր և հարստացրո՛ւ» բանաձևը հենց սրան է վերաբերում: 

«Հարկային վարչարարությունը պետք է իր թիրախում պահի հարկային կարգապահության հարցը, և ուրախ եմ, որ վերջին տարվա ընթացքում կայացած որոշումներն ու օրենսդրական փոփոխություններն այս իմաստով ընդլայնել են վարչարարության գործիքակազմը»,- նշեց նախարարը:

Ինչ վերաբերում է տնտեսական զարգացումներին՝ Հովհաննիսյանն ասաց, որ 2024 թվականը Հայաստանի Հանրապետության համար տնտեսական աճի կայունացման ժամանակահատված էր: 2024-ին գրանցվել է 5,9 տոկոս տնտեսական աճ՝ պայմանավորված հիմնականում ծառայությունների աճով:

Տնտեսական աճը ուղեկցվել է ներքին ու արտաքին պահանջարկի աճով:

2021-2024-ին ՀՀ տնտեսությունում միջինում գրանցվել է 8,2 տոկոս տնտեսական աճ: Հարկ է նշել, որ վերջին տարիների զարգացումների արդյունքում պոտենցիալ աճը ևս բարձրացել է՝ նախկին 4-4,5 տոկոս գնահատականի դիմաց այժմ գնահատվում է 5-5,5 տոկոս:

2024-ին, 2023 թվականի համեմատ, 4,9 տոկոսով աճել է մեկ շնչին ընկնող ՀՆԱ-ն՝ հասնելով 3 միլիոն 360 հազար դրամի կամ 856 ԱՄՆ դոլարի»,- հայտնեց ֆինանսների նախարարը:

Նա ընդգծեց, որ ԼՂ-ից բռնի տեղահանված մեր հայրենակիցներին ՀՀ տնտեսական կյանքին արդյունավետ ինտեգրելու Կառավարության ջանքերը ևս նպաստել են տնտեսական ներուժի բարձրացմանը: 

Վերջին 3 տարիների բարձր տնտեսական աճը, ըստ նախարարի, ուղեկցվել է նաև բնակչության կենսամակարդակի բարձրացմամբ:

«Հատկանշական է, որ 2024-ին աշխատավարձերի և վարձու աշխատողների աճ է գրանցվել տնտեսության գրեթե բոլոր ոլորտներում: 2024-ին միջին ամսական անվանական աշխատավարձը աճել է 6,4 տոկոսով՝ կազմելով 287 հազար 172 դրամ իսկ վարձու աշխատողների թիվը՝ 5,2 տոկոսով՝ կազմելով 760 հազար 555 մարդ»,- տեղեկացրեց Հովհաննիսյանը: