Իսրայելը հարձակվել է Իրանում ռազմական արտադրության օբյեկտների վրա

Վերջին ժամերին Իսրայելի ռազմաօդային ուժերի ավելի քան 50 կործանիչներ, Հետախուզության վարչության ճշգրիտ ղեկավարությամբ, մի շարք հարձակումներ են իրականացրել Թեհրանի տարածքում գտնվող ռազմական արտադրական օբյեկտների վրա, հաղորդում է Իսրայելի պաշտպանության բանակի մամուլի քարտուղարությունը։

Նշվում է, որ Իրանի միջուկային զենքի ծրագրին վնաս հասցնելու ջանքերի շրջանակներում հարձակման է ենթարկվել Թեհրանում գտնվող ցենտրիֆուգների արտադրության օբյեկտը։ Ցենտրիֆուգների արտադրությունը կօգնի Իրանին ընդլայնել ուրանի հարստացման ծավալներն ու արագությունը միջուկային զենք ստեղծելու նպատակով։

Իրանը հարստացնում է ուրանը, որը նախատեսված է միջուկային զենք ստեղծելու համար։ «Քաղաքացիական օգտագործման համար միջուկային զարգացումը չի պահանջում հարստացում այս մակարդակներում»,-ընդգծել է Իսրայելի պաշտպանության բանակը:

Զանգվածային հարձակումները հարվածել են զենքի արտադրության մի քանի օբյեկտների, մասնավորապես՝ «երկիր-երկիր» հրթիռների հավաքման հումք և բաղադրիչներ արտադրող օբյեկտի, որը Թեհրանը «արձակել և շարունակում է արձակել Իսրայել պետության ուղղությամբ»:

Բացի այդ, իսրայելական հարձակումները թիրախավորել են օբյեկտները, որոնք արտադրում են «երկիր-օդ» հրթիռների համակարգեր և բաղադրիչներ, որոնք նախատեսված են ինքնաթիռներ ոչնչացնելու համար:

Այս թիրախները հարձակման են ենթարկվել Իսրայելի պաշտպանության բանակի ջանքերի շրջանակներում՝ խաթարելու Իրանի միջուկային զենքի ծրագիրը և հրթիռային արդյունաբերությունը: