«Երկիր». Ո՞ւմ թելն է թելում ԲՀԿ մամլո քարտուղարը

Թերթը գրում է. «ԲՀԿ նախագահ Գագիկ Ծառուկյանի մամուլի քարտուղար Խաչիկ Գալստյանը կարծես մոռացել է իր բուն գործառույթների մասին և իրեն կուսակցությունում այլ գործառույթներ է վերապահում։ Մեր տեղեկություններով՝ Գալստյանը կուսակցությունում նեղացնում է անխտիր բոլորին՝ առանց տարիքային սահմանափակման, անգամ հաշվի չառնելով կուսակցության ներսում տվյալ անձի զբաղեցրած դիրքը: Հավանաբար, Խաչիկը կուսակցության ներսում էլ «սիմպատիայով» է առաջնորդվում: Մամուլի քարտուղարը շեֆին եղելությունը ներկայացնում է իրեն հարմար տարբերակով, եթե մեկին էլ չի հավանում՝ Ծառուկյանի ականջին «նստում է» այնքան, մինչև նա էլ հիասթափվի:

Իրականում մամուլի քարտուղարի այս գործողությունները շեֆին լավ ծառայություններ մատուցելու արգասիքը չեն: Գալստյանն այլ խնդիր է լուծում. փորձում է Ծառուկյանի կողքերից հեռացնել նրան քիչ թե շատ հավատարիմ կուսակցականներին, իսկ նրանց փոխարեն իր ուզած մարդկանց է մեջտեղ բերում: Ի դեպ, մեր տեղեկությունների համաձայն, ժամանակին Գալստյանի թեկնածությունը Գագիկ Ծառուկյանին առաջարկել են նախագահականից... Ինչ իմանաս, գուցե Խաչիկը դեռ չի մոռացել «հին շեֆերին»...»։