Ռուսաստանը ոչ մի շանս չունի ԵՄ-ի և ՆԱՏՕ-ի դեմ․ ԵՄ ներկայացուցիչ Կալլաս

ԵՄ արտաքին գործերի և անվտանգության քաղաքականության գերագույն ներկայացուցիչ Քաջա Կալլասը հայտարարել է, որ Ռուսաստանը «շանս չունի» Եվրամիության և ՆԱՏՕ-ի դեմ։ Նրա խոսքերը Եվրախորհրդարանում ելույթից մեջբերում է Bild-ը։

«Ռուսաստանը հնարավորություն չունի ՆԱՏՕ-ի և ԵՄ-ի դեմ: Բայց մենք պետք է միասին մնանք: Դաշինքի միասնության պահպանումը նույնքան կարևոր է, որքան պաշտպանական ծախսերի ավելացումը: Ես չեմ հավատում, որ կա սպառնալիք, որը մենք չենք կարող հաղթահարել, եթե գործենք միասին և ՆԱՏՕ-ի մեր դաշնակիցների հետ», - ասել է Կալլասը:

Իր ելույթի ժամանակ նա նաև ասել է, որ եթե Եվրոպան դադարի օգնել Ուկրաինային, պետք է սկսի ռուսերեն սովորել։ Նրա խոսքով, Ուկրաինան Եվրոպայի պաշտպանության առաջին գիծն է, և Ռուսաստանը պատասխանում է ուժին «և ոչ մի այլ բանի»: Նա կոչ է արել ավելին անել Կիևի և նրա անվտանգության համար:

Կալլասը նշել է, որ Ռուսաստանը անցյալ տարի ավելի շատ է ծախսել պաշտպանության վրա, քան ամբողջ Եվրամիությունը։ Եվրոպական դիվանագիտության ղեկավարը պնդում է, որ դա վկայում է «երկարաժամկետ ագրեսիայի» պլանների մասին։