Ռուսաստանի Գերագույն դատարանը «Ալլատրա» ուկրաինական շարժումը ճանաչել է ծայրահեղական

Ռուսաստանի Գերագույն դատարանը բավարարել է գլխավոր դատախազ Իգոր Կրասնովի հայցը և ճանաչել ուկրաինական «Ալլատրա» շարժումն որպես ծայրահեղական։ Ըստ դատական որոշման՝ կազմակերպության ցանկացած գործունեություն Ռուսաստանի տարածքում արգելվում է։ Դատախազության տվյալներով՝ շարժումը դեռ 2023-ին հայտարարվել էր անցանկալի, սակայն անդամներն այդուհանդերձ շարունակել են հակաօրինական գործունեություն։

Գլխավոր դատախազությունը նշել է, որ «Ալլատրա»-ն համակարգված կերպով տարածել է կեղծ տեղեկություններ, որոնք վարկաբեկում են Ռուսաստանի Զինված ուժերը՝ սկսած հատուկ ռազմական գործողության առաջին օրերից։ Շարժման ավելի քան 20 անդամների դեմ արդեն հարուցվել են քրեական գործեր։

Ավելի վաղ, Կրասնոյարսկի երկրամասում անվտանգության ծառայությունները և քննիչները ձերբակալել էին «Ալլատրա»-ի յոթ ակտիվիստների, գրում է Лента.ру-ն։