Ուկրաինան պատրաստվում է դադարեցնել վարկի մարումը Չինաստանի բանկի նկատմամբ

Ուկրաինայի կառավարությունը նախատեսում է ժամանակավորապես դադարեցնել Չինաստանի արտահանման-ներմուծման բանկին տրամադրվող վճարումները՝ 2012 թվականին պետական երաշխիքով վերցված վարկի գծով։ Այս մասին հայտնել է Գերագույն ռադայի պատգամավոր Յարոսլավ Ժելեզնյակը։

Խոսքը վերաբերում է մեկուկես միլիարդ դոլար արժողությամբ վարկին, որը վերցվել էր հացահատիկի արտահանման նպատակով։ Քանի որ վարկ ստացած պետական ընկերությունը ֆինանսապես անկարող է այն մարել, պարտավորությունները փաստացիորեն փոխադրվել են պետության վրա։ Կիևը հույս ունի, որ վճարումների դադարեցումը թույլ կտա նոր պայմաններով բանակցել և հասնել ավելի շահավետ համաձայնության։

Նշենք, որ մայիսին Ուկրաինան արդեն թույլ էր տվել տեխնիկական դեֆոլտ՝ չվճարելով 665 միլիոն դոլար արտաքին պարտքի գծով։ Մարտի դրությամբ երկրի պետական պարտքը կազմել է 171.73 միլիարդ դոլար, և կանխատեսվում է, որ 2025-ի ընթացքում այն կաճի մինչև ՀՆԱ-ի 110 տոկոսը։