Թուրքիայում բողոքում են Patriot հրթիռների դեմ

Թուրքիայի հարավում Սիրիայի հետ սահմանակից Ղազիայնթափ քաղաքում տեղակայվում են ԱՄՆ-ի կողմից տրամադրված Patriot զենիթահրթիռային համակարգերը: Այստեղ տեղակայվող 2 հրթիռներն ամենամոտն են գտնվելու Սիրիային, քան մյուս 4 հրթիռները, որոնք տրամադրվելու են Գերմանիայի և Նիդեռլանդների կողմից:

Patriot հրթիռները կկարողանան ֆիքսել Սիրիայի՝ մեծությամբ երկրորդ քաղաք Հալեպի, ինչպես նաև Իդլիբի օդային տարածքներով թռչող օբյեկտները: Եvս երկու Patriot հրթիռ, որոնք կտրամադրվեն Գերմանիայի կողմից, կտեղակայվեն Սիրիայից 70-90 կմ հեռավորության վրա գտնվող Քահրամանմարաշ նահանգում: Դրանք պլանավորում են տեղակայել 2013թ. փետրվարի 1-ին:

Իսկ Նիդեռլանդների տրամադրած հրթիռները կգործեն Ադանայում, որպեսզի հսկողություն սահմանեն Միջերկրական ծովի արևելյան հատվածների, այդ թվում՝ սիրիական Տարտուս և Լաթաքիա նավահանգստային քաղաքների վրա:

Իսկ այս ժամանակ Թուրքիայում վարչապետ Ռեջեփ Թայիփ Էրդողանի ռեժիմին ընդդիմադիր կոմունիստական կուսակցության անդամները բողոքի ակցիա են կազմակերպել Patriot հրթիռների տեղակայման դեմ: Ինչպես հայտնում է իրանական Press TV-ն, նախօրեին Թուրքիայի փողոցներում հավաքվել էր շուրջ 1000 մարդ՝ վանկարկելով «ՆԱՏՕ, դո՛ւրս կորիր Թուրքիայից»:

ՆԱՏՕ-ի ներկայացուցիչներն իրենց հերթին վստահեցնում են, որ հրթիռների տեղակայումը միայն պաշտպանողական նպատակներ է հետապնդում: