Ադրբեջանի ԱԳՆ-ն բողոք է հայտնել ՌԴ դեսպանության ժամանակավոր հավատարմատարին

Ադրբեջանի արտաքին գործերի նախարարությունը կանչել է Բաքվում Ռուսաստանի դեսպանատան գործերի ժամանակավոր հավատարմատար Պյոտր Վոլոկովին՝ կապված Ռուսաստանի Եկատերինբուրգ քաղաքում տեղի ունեցած միջադեպի հետ, որտեղ անվտանգության ուժերի կողմից իրականացված ռեյդերի արդյունքում զոհվել են ադրբեջանական ծագում ունեցող քաղաքացիներ։

Ինչպես հաղորդում է Ադրբեջանի արտաքին գործերի նախարարությունը, հունիսի 28-ին ռուս դիվանագետին կտրուկ բողոք է հայտնվել՝ կապված հունիսի 27-ին Ռուսաստանի անվտանգության ուժերի կողմից իրականացված գործողության հետ։ Բաքվի տվյալներով՝ ադրբեջանցիների բնակարանների վրա կատարված խուզարկությունների ժամանակ դաժանորեն սպանվել է երկու մարդ, ևս մի քանիսը ստացել են ծանր մարմնական վնասվածքներ, իսկ ինը քաղաքացիներ ձերբակալվել են։

«Ռուսական կողմը տեղեկացվել է տեղի ունեցածի անհապաղ, համապարփակ և թափանցիկ հետաքննության մեր ակնկալիքի, ինչպես նաև այս անընդունելի բռնության ակտին ներգրավված բոլոր անձանց անհապաղ քրեական հետապնդման մասին», - ասվում է Արտաքին գործերի նախարարության հայտարարության մեջ։

Միջադեպը լայն հասարակական արձագանք է առաջացրել ինչպես Ադրբեջանում, այնպես էլ արտերկրում: Պաշտոնական Բաքուն պահանջում է երաշխիքներ Ռուսաստանի Դաշնության տարածքում գտնվող Ադրբեջանի քաղաքացիների անվտանգության համար: