Ռուբեն Հախվերդյանը իրեն տեսնում է մշակույթի նախարարի պաշտոնում

«Հայաստանը Ռուսաստանի պոլիգոնն է», – այսօր լրագրողների հետ հանդիպման ժամանակ ասաց Ռուբեն Հախվերդյանը։

Նրա խոսքերով՝ այսօր այնպիսի անհեթեթ բաներ են տեղի ունենում, ինչպես օրինակ Մեսրոպ Մաշտոցի անվան կոչման հանձնումը Ալլա Պուգաչովային, և այդ հանճարեղ մարդու անվան կրծքանշանը կախված է Պուգաչովայի կրծքավանդակից։

«Ես համարում եմ, որ մենք հետամնաց ենք, և առաջիկա հիսուն տարիներին չեմ տեսնում այդ զարգացումը», – ասաց երգահանը։

Նրա խոսքերով՝ հայ ազգն այսօր կորցրել է իր խոհանոցը, մշակույթը, կրոնը. «Մնում է լեզուն էլ մոռանանք, և դառնանք զոմբի», – հայտարարեց Ռուբեն Հախվերդյանը։

Ասուլիսի ընթացքում վերջինս հայտարարեց, թե սոված է, և ուզում է ավարտել ասուլիսը։ Իսկ ասուլիսի սկզբում էլ ասուլիսավարին էր ցանկանում «ձեռք գցել», ինչն էլ տեղիք տվեց մտածելու, որ երգահանը սթափ վիճակում չէր։

Սակայն պատասխանեց լրագրողների այն հարցին, թե ում է տեսնում Մշակույթի նախարարի պաշտոնում. « Մշակույթի նախարարի պաշտոնում ես ինձ եմ տեսնում, և առաջին բանը, որ կանեմ, դա կհավաքեմ բոլոր մեդալները, կտամ դրանք բաժանողին՝ նորից բաժանելու համար, սակայն այդ ժամանակ ես էլ պետք է «լափեմ», հակառակ դեպքում ես էլ երկար չեմ մնա այդ պաշտոնում, բոլորն էլ լափում են», – ասաց երգահանը։

Ասուլիսի վերջում նա տեղեկացրեց, որ առաջիկայում երկու նոր ձայնապնակ է թողարկելու։