Իրանը կարող է վերսկսել ուրանի հարստացումը մի քանի ամսվա ընթացքում․ ԱԷՄԳ տնօրեն

Ատոմային էներգիայի միջազգային գործակալության (ԱԷՄԳ) փորձագետները որևէ նշան չեն տեսել, որ Իրանի միջուկային ծրագիրը նպատակաուղղված է եղել միջուկային զենք ստեղծելուն։ Այս մասին հայտարարել է գործակալության գլխավոր տնօրեն Ռաֆայել Գրոսսին ամերիկյան CBS News հեռուստաընկերությանը տված հարցազրույցում։

«Մենք չենք տեսել, որ ծրագիրը նպատակաուղղված է եղել դրան (միջուկային զենք ստեղծելուն), բայց միևնույն ժամանակ նրանք (իրանական իշխանությունները) պատասխան չեն տվել շատ, շատ կարևոր հարցերից մի քանիսին», - ասել է հեռուստաընկերության զրուցակիցը։

Գրոսին հավելել է, որ ԱԷՄԳ փորձագետները միշտ «ազնվորեն են գնահատել իրավիճակը» իրանական միջուկային ծրագրի շուրջ։ Գործակալության ղեկավարը նշել է, որ իրենց զեկույցներում տեղեկություն չի տրամադրվել Իրանի կողմից միջուկային զենք ունենալու, ինչպես նաև այն ձեռք բերելու փորձերի մասին։

ԱԷՄԳ ղեկավարը նաև ասել է, որ Իրանը կարող է մի քանի ամսվա ընթացքում վերսկսել հարստացված ուրանի արտադրությունը, որի համար ունի արդյունաբերական և տեխնոլոգիական հնարավորություններ։ Գրոսսին նշել է, որ վերահաստատել է իր կոչը՝ վերադառնալ բանակցությունների սեղանի շուրջ և գտնել «տեխնիկապես հիմնավոր» լուծում Իրանի միջուկային ծրագրի հարցի շուրջ՝ հավելելով, որ այժմ հնարավորություն կա դա անելու համար։