Գերմանիան մտադիր է ստեղծել գերմանա-իսրայելական կիբերհետազոտությունների կենտրոն և «Կիբերգմբեթ»

Գերմանիան մտադիր է ստեղծել գերմանա-իսրայելական կիբերհետազոտությունների համատեղ կենտրոն և խորացնել երկու երկրների հետախուզական և անվտանգության ծառայությունների միջև համագործակցությունը։ Այս մասին կիրակի օրը հայտարարել է Գերմանիայի ներքին գործերի նախարար Ալեքսանդր Դոբրինդտը, հայտնում է Reuters-ը։

Գերմանիան Եվրոպայում Իսրայելի ամենամոտ դաշնակիցներից է, և Բեռլինն ավելի ու ավելի է ձգտում օգտագործել Իսրայելի փորձը պաշտպանության ոլորտում, քանի որ մեծացնում է իր ռազմական ներուժը և ներդրումը ՆԱՏՕ-ում։

«Անվտանգության ոլորտում այս շրջադարձին հասնելու համար միայն ռազմական պաշտպանությունը բավարար չէ։ Քաղաքացիական պաշտպանության զգալի արդիականացումը նույնպես անհրաժեշտ է մեր ընդհանուր պաշտպանական կարողություններն ամրապնդելու համար»,- ասել է Դոբրինդտը Իսրայել կատարած այցի ժամանակ, հայտնում է գերմանական Bild թերթը։

Դոբրինդտը, որին անցյալ ամիս նշանակել է Գերմանիայի նոր կանցլեր Ֆրիդրիխ Մերցը, Իսրայել է ժամանել շաբաթ օրը։

Ըստ Bild-ի տեղեկությունների, Դոբրինդտը ներկայացրել է հինգ կետից բաղկացած ծրագիր, որն ուղղված է Գերմանիայի համար, իր իսկ բնորոշմամբ, «Կիբերգմբեթ»-ի ստեղծմանը՝ որպես կիբերպաշտպանության ռազմավարության մաս։

Ավելի վաղ Բավարիայի վարչապետ Մարկուս Սյոդերը կոչ էր արել ձեռք բերել 2000 հրթիռ-կալանիչ՝ Գերմանիան «Երկաթե գմբեթ» համակարգով զինելու համար, որը նման է իսրայելական փոքր հեռահարության հակահրթիռային պաշտպանության տեխնոլոգիային։

news.am