Ադրբեջանում ցանկանում են փակել ռուսալեզու դպրոցները

Ադրբեջանական լրատվամիջոցները հաղորդում են երկրի դպրոցներում ռուսալեզու կրթության հնարավոր դադարեցման մասին։ Ըստ Oxu.Az պարբերականի՝ աշակերտների ծնողները սկսել են համապատասխան ծանուցումներ ստանալ դպրոցական WhatsApp խմբերում։

Նշվում է, որ նախաձեռնությունը կապված է ադրբեջաներենի՝ որպես կրթության հիմնական լեզվի դիրքը ամրապնդելու և բոլոր քաղաքացիների համար միասնական կրթական միջավայր ստեղծելու մտադրության հետ։ Անցումը նախատեսվում է իրականացնել փուլ առ փուլ՝ երեք տարվա ընթացքում։

2024 թվականի օգոստոսին Ադրբեջանի նախագահ Իլհամ Ալիևը հայտարարեց, որ երկրում գործում է 324 ռուսալեզու դպրոց, որտեղ սովորում է մոտ 160 հազար երեխա։ Բացի դրանից, ռուսերենը որպես երկրորդ լեզու դասավանդվում է ևս 800 հազար աշակերտի։

Կրթության բարեփոխումների ծրագրերը հայտնի դարձան Բաքվի և Մոսկվայի միջև հարաբերությունների կտրուկ վատթարացման ֆոնին։ Լարվածություն առաջացավ Եկատերինբուրգում ադրբեջանական կազմակերպված հանցավոր խմբի անդամների ձերբակալությունից հետո, որոնցից երկուսը մահացան։ Բաքուն Ռուսաստանի իրավապահ մարմիններին մեղադրեց դաժան վերաբերմունքի մեջ։

Ի պատասխան՝ Ադրբեջանի իշխանությունները ձերբակալել են ռուսական «Սպուտնիկ» գործակալության աշխատակիցների և Ռուսաստանի մի քանի քաղաքացիների, որոնք մեղադրվում են կազմակերպված հանցավոր խմբավորումներին մասնակցելու և թմրանյութերի ապօրինի շրջանառության մեջ։

news.am