ՀՀ արդարադատության նախարարն ընդունել է ԵԽԽՎ մոնիտորինգի հանձնաժողովի համազեկուցողին

Հունվարի 17-ին ՀՀ արդարադատության նախարար Հրայր Թովմասյանն ընդունեց Եվրախորհրդի խորհրդարանական վեհաժողովի մոնիտորինգի հանձնաժողովի համազեկուցողներ լորդ Ջոն Պրեսկոտիի ղեկավարած պատվիրակությանը: Հանդիպման սկզբում պարոն Պրեսկոտը նախ փոխանցեց այս այցի ընթացքում ստացած իր տպավորություններն ու դիտարկումները Հայաստանում առկա ընդհանուր մթնոլորտի վերաբերյալ:

«Չորս տարի առաջ իրավիճակը դաժան էր, հանդիպումների ժամանակ մարդիկ խոսում էին կեղծված ընտրությունների, մարտիմեկյան իրադարձությունների վերաբերյալ, հիմա մթնոլորտը և ակնկալիքները փոխվել են, որն իսկապես դրական երևույթ է»,- նշեց ԵԽԽՎ Հայաստանի հարցով մոնիտորինգի համազեկուցող լորդ Ջոն Պրեսկոտը` հավելելով, որ այս անգամ ընդդիմադիր քաղաքական ուժերին հուզող խնդիրը հիմնականում մեծամասնական ընտրակարգի վերացման էր վերաբերում:

Հայաստան կատարած այցից հետո նախատեսվող զեկույցում պետք է անդրադառնան երկրում իրականացվող բարեփոխումներին՝ մասնավորապես, դատական, ոստիկանական համակարգերում: Ուստի հյուրի խնդրանքով ՀՀ արդարադատության նախարար Հ.Թովմասյանը ներկայացրեց բարեփոխումների փիլիսոփայությունը, իրականացվող և առաջիկայում նախանշված քայլերի ողջ ցանկն ու գործողությունների ծրագիրը:

Նախարար Թովմասյանը լորդ Ջոն Պրեսկոտի ղեկավարած պատվիրակությանը ներկայացրեց նաև իր պաշտոնավարման ընթացքում քրեակատարողական հիմնարկներում, դատարաններում կատարված մի շարք աշխատանքներ' զուգահեռաբար ընդգծելով, որ դրանք, իհարկե, բավարար չեն, քանի որ հարցումների արդյունքներով դատական իշխանությունների նկատմամբ դեռևս 80% անվստահություն կա: «Պատճառները բազմաբնույթ են», -շեշտեց արդարադատության նախարարը, թվարկելով դրանցից մի քանիսը' օրենսդրությունում դեռևս պահպանվում են կոռուպցիոն ռիսկերը, առկա են կադրային խնդիրներ և այլն:

Թվարկված խնդիրները լուծելու նպատակով էլ մշակվել և առաջիկայում Հանրապետության Նախագահի հաստատմանն է ներկայացվելու 2012-16 թվականների դատաիրավական բարեփոխումների հայեցակարգը, իսկ մինչ այդ, հունվարի 20-ին, հայեցակարգը բաց քննարկման է դրվելու խորհրդարանում:

ՀՀ արդարադատության նախարարը հյուրերին ներկայացրեց նաև անհրաժեշտ այն գործողություններն ու օրենսդրական փոփոխությունները, որոնք կհանգեցնեն դատաիրավական բարեփոխումների լիարժեք իրականացմանը: Շեշտելով դատաիրավական բարեփոխումների առաջնահերթությունն ու կարևորությունը՝ նախարար Թովմասյանն ընդգծեց, որ առանց դատական իշխանությունների լրջագույն բարեփոխումների, որևէ այլ բնագավառում էական արդյունքների հասնել հնարավոր չէ:

Անդրադառնալով խորհրդարանական ընտրություններին, ՀՀ արդարադատության նախարարնը շեշտեց, որ Հանրապետության նախագահի գերխնդիրն է ապահովել թափանցիկ, եվրոպական չափանիշներին համապատասխան ընտրություններ, ինչը կարևոր է ոչ միայն ժողովրդավարության ցուցանիշ ապահովելու, այլև հասարակական-քաղաքական առկա կոնֆլիկները հանգուցալուծելու առումով:

ԵԽԽՎ մոնիտորինգի հանձնաժողովի համազեկուցող լորդ Ջոն Պրեսկոտը ի պատասխան այս դիտարկաման կատակեց, թե «ծառը աճում է և ցուցանիշը կլինի աճող պտուղը, այսինքն հանրության վստահության վերականգնումը»: