Հայոց ցեղասպանության ժխտումը քրեականացնող օրինագիծը համարվել է հակասահմանադրական

 Ֆրանսիայի Սենատի իրավական հարցերով հանձնաժողովն այսօր մերժել է Սենատ ներկայացված ցեղասպանությունների, այդ թվում Հայոց ցեղասպանության ժխտումը քրեականացնող օրինագիծը` այն համարելով հակասահմանադրական:

Ինչպես Մեդիամաքս-ի հետ զրույցում հաղորդել է Ֆրանսիայի Հայ Դատի գրասենյակի ղեկավար Հրաչ Վարժապետյանը, հանձնաժողովի անդամները 23 «կողմ», 9 «դեմ» եւ 8 «ձեռնպահ» ձայների հարաբերակցությամբ մերժել են օրինագծի տեքստը: 

Հրաչ Վարժապետյանի փոխանցմամբ,  հանձնաժողովի անդամները հորդորել են սենատորներին հրաժարվել հունվարի 23-ին Սենատում նախատեսված օրինագծի քննարկումից` պատճառաբանելով, թե 2011 թ. մայիսին Սենատը չէր ընդունել նմանատիպ օրինագիծը:
 
«Այնուամենայնիվ, հանձնաժողովի այդ դիրքորոշումը չի կարող խանգարել Սենատի լիագումար նիստում հունվարի 23-ին սպասվող քննարկմանը, քանի որ ներկա պահին սենատորների մեծամասնություն կողմ են օրինագծի քննարկմանը»,- Մեդիամաքս-ին ասել է Հրաչ Վարժապետյանը` հավելելով, որ օրինագիծն արդեն փոխանցվել է Սենատի օրակարգ, որն արդեն իսկ հաստատված է: 

Ֆրանսիայի Հայ դատի գրասենյակի ղեկավարը նաեւ նշել է, որ Սենատի նախագահ Ժան Պիեռ Բելը վերջերս հայտարարել է, որ թեեւ կողմ չէ նմանատիպ օրինագծերի քննարկմանը Սենատում, բայց չի խոչընդոտի գործընթացին: