«Թումանյանի տուն-թանգարանի վերաբերյալ անընդհատ մեզ գալիս են շատ իրարամերժ տեղեկություններ». ՀՀ մշակույթի նախարար

«Թումանյանի տուն-թանգարանի վերաբերյալ անընդհատ մեզ գալիս են շատ իրարամերժ տեղեկություններ։ Եվ դա է պատճառը, որ մենք քննարկեցինք ՀՀ վարչապետի մոտ այդ խնդիրը, և որոշվեց, որ Լևոն Անանյանի գլխավորությամբ մտավորականների պատվիրակություն կմեկնի Թբիլիսի՝ տեղում բոլոր հարցերը պարզելու», – այսօր լրագրողների հետ ճեպազրույցում ասաց ՀՀ մշակույթի նախարար Հասմիկ Պողոսյանը։

«Միայն վերջին ժամանակներում սկսվեց խոսվել այն մասին, որ այդ տարածքը վաճառվում է համապատասխան մարդկանց կողմից։ Միևնույն ժամանակ կարծում եմ, որ հարկ է նշել, որ այդ տարածքը պատկանում է Թումանյանի ընտանիքին, իսկ ով որ ուզում է գնել այդ տարածքը չի կարող առանց թույլտվության այն օգտագործել։ Այս պարագայում ես կարծում եմ, որ շատ կարևոր է որպեսզի ընտանիքը երբևիցէ չմտածի վաճառքի մասին։ Այս պահին այդ խնդիրը չկա, բայց խնդրի վերաբերյալ կան շատ հակասական կարծիքներ։ Ես կարծում եմ, որ պատվիրակության վերադարձից հետո մենք կկարողանանք հստակ պատասխանել բոլոր հարցերին։ Այսօր մեկնում է պատվիրակությունը։ Որևէ մեկը չկա, ով մտահոգ չէ այս հարցերով, առավել ևս, որ դա վերաբերում է Հովհաննես Թումանյանի անվանը, բայց կգերադասեի բոլոր հարցերի պատասխանները տալ մի քանի օր հետո», – նշեց նախարարը։