Սիրիայում ապստամբների հարձակումների հետևանքով փակվել է օդանավակայանը

Սիրիայի Հալեպ քաղաքի միջազգային օդանավակայանը ապստամբների հարձակումների պատճառով փակվել է. այս մասին հունվարի 1-ին հայտնում է Agence France-Presse-ը:

Պաշտոնապես հայտարարվել է, որ Սիրիայի` մեծությամբ երկրորդ քաղաք Հալեպի օդանավակայանը փակվել է թռիչքուղու վերանորոգման և մի քանի խափանումների կարգավորման համար:

Սակայն AFP-ի լրագրողը, հղում կատարելով ոմն պաշտոնյայի, նշում է, որ վերջինս պնդում է, թե Սիրիայի իշխանությունները փակել են օդանավակայանը՝ զգուշանալով քաղաքացիական օդանավերի վրա ապստամբների կազմակերպած հարձակումներից:

Նույն պաշտոնյան հավելել է նաև, որ օդանավակայանը շուտով կրկին կվերաբացվի. կառավարական զորքերն ակտիվորեն մաքրում են ապստամբներից նրանց գրաված բազաները:

Սուրիա և Ալ Մայադին հեռուստաընկերությունները հաղորդում են, որ հունվարի 1-ի դրությամբ բանակն ապստամբներին լիկվիդացնելու հատուկ գործողություններ է մշակում նաև Դամասկոսի մատույցներում՝ պաղեստինցի փախստականներով բնակեցված Յարմուկ ճամբարում: