Իսրայելի կառուցած պատը դարձրել է «մեծ բանտ»՝ կտրելով պաղեստինցիներին կյանքից և հողից

Իսրայելի կողմից զբաղեցված Արևմտյան Ափի Սինջիլ քաղաքում 5 մետր բարձրությամբ մետաղյա ցանկապատ է կառուցվել՝ շրջափակելով բնակավայրը և միայն մեկ ելք թողնելով մոտ 8,000 բնակչի համար։ Պաղեստինցիները սա անվանում են «մշտական պաշարում», որն ավելի է խստացել Գազայի պատերազմից հետո։ Բնակիչները զրկվել են իրենց հողերից և ապրուստից, իսկ գյուղատնտեսական տարածքները մնացել են ցանկապատի մյուս կողմում։

Իսրայելը պնդում է, որ ցանկապատը կառուցվել է՝ ապահովելու Ռամալլա-Նաբլուս մայրուղու անվտանգությունը, պաշտպանելու իսրայելցի բնակիչներին քարերով և մոլոտովյան կոկտեյլներով հարձակումներից։ Սակայն պաղեստինցի պաշտոնյաներն ասում են՝ սա միտումնավոր քաղաքականություն է՝ մարդկանց կոտրելու և նրանց ապրուստը կործանելու համար, հայտնում է Reuters-ը։

Ճանապարհները փակվել են հողի բլուրներով, դրված են մետաղյա դարպասներ, նոր անցակետեր, իսկ երթևեկը դարձել է անկանխատեսելի։ Սինջիլի բնակիչներն ասում են՝ առաջ 20 րոպեում էին հասնում Ռամալլա, հիմա ճանապարհը կարող է տևել մինչև 3 ժամ՝ խցանումների և անցակետերի պատճառով։ Պաղեստինցի պաշտոնյաները զգուշացնում են՝ նման ճնշումները կարող են հետադարձ ազդեցություն ունենալ՝ մղելով երիտասարդներին ծայրահեղ քայլերի։