Թրամփը Զելենսկու հետ զրույցից հետո գնահատել է Ուկրաինայում ստեղծված իրավիճակը

ԱՄՆ նախագահ Դոնալդ Թրամփը Ուկրաինայի շուրջ ստեղծված իրավիճակը որակել է` որպես «շատ բարդ»՝ հուլիսի 4-ին Վոլոդիմիր Զելենսկու հետ հեռախոսազրույցից հետո։ Նա այս մասին լրագրողներին ասել է իր ինքնաթիռում, հաղորդում է ՏԱՍՍ-ը՝ հղում անելով Սպիտակ տան մամուլի ծառայությանը։

Ամերիկացի առաջնորդի խոսքով՝ իր ուկրաինացի գործընկերոջ հետ զրույցը «շատ ռազմավարական» էր։ Թրամփը շեշտել է, որ Զելենսկու հետ քննարկել է «տարբեր բաներ», բայց մանրամասներ չի բացահայտել։ Միևնույն ժամանակ, նա դժգոհություն է հայտնել Ռուսաստանի նախագահ Վլադիմիր Պուտինի հետ հուլիսի 3-ին տեղի ունեցած իր նախորդ երկխոսության վերաբերյալ։

«Պուտինը ուզում է մինչև վերջ գնալ։ Սա լավ չէ», - ասել է Թրամփը՝ ակնարկելով Մոսկվայի դիրքորոշմանը ուկրաինական հակամարտության հարցում։

Նա հավելել է, որ կասկածում է Ռուսաստանի պատրաստակամության մեջ՝ լուծելու հակամարտությունը։