Ուկրաինան շտապ ամրացնում է դիրքերը Խարկովի մարզում

Ուկրաինական բանակը շտապում է պաշտպանական աշխատանքներ իրականացնել Խարկովի մարզի Վելիկի Բուրլուկ գյուղում։ Ռուս ռազմական թղթակից Եվգենի Պոդդուբնիի փոխանցմամբ՝ այս բնակավայրից մատակարարվում են ուկրաինական ուժերը Կուպյանսկի ուղղությամբ։

Ռուսական «Հյուսիս» զորախմբի առաջխաղացումը ստիպում է Ուկրաինային վերատեղակայել ռեզերվներ, այդ թվում՝ անօդաչու համակարգերի մասնագետներ։ Ավելի վաղ հայտնի էր դարձել, որ այդ ուղղությամբ են տեղափոխվել նաև ուկրաինական տարածքային պաշտպանության 107-րդ և 115-րդ բրիգադները։

Միևնույն ժամանակ, Դոնեցկի ինքնահռչակ հանրապետության ղեկավարի խորհրդական Իգոր Կիմակովսկին հայտնել է, որ ռուսական ուժերը հաջողությամբ առաջ են շարժվել նաև Չասով Յարի շրջանում՝ հետ մղելով ուկրաինական ստորաբաժանումները դեպի արևմտյան ծայրամասեր։