Ուկրաինան և Դանիան պայմանավորվել են զենքի համատեղ արտադրության շուրջ

Ուկրաինայի նախագահ Վլադիմիր Զելենսկին X-ում հայտարարել է, որ երկիրը, արտասահմանյան գործընկերների հետ համատեղ, նախատեսում է մեծացնել հեռահար զենքի և անօդաչու թռչող սարքերի արտադրությունը։

Նոր համաձայնագրերի թվում է Դանիայի հետ զենքի համատեղ արտադրության մասին համաձայնագիրը։ Ինչպես հավելել է Ուկրաինայի ռազմավարական արդյունաբերության նախարար Գերման Սմետանինը, Դանիան կլինի առաջին երկիրը, որը կօգտագործի ուկրաինական պաշտպանական տեխնոլոգիաները զենքի արտադրության և մասշտաբավորման համար։

Բացի այդ, Ուկրաինան պայմանագիր է կնքել ամերիկյան Swift Beat ընկերության հետ։ Ըստ համաձայնագրի՝ Կիևը ակնկալում է ստանալ հարյուր հազարավոր անօդաչու թռչող սարքեր։

Ուկրաինայի նախագահի գրասենյակի հայտարարության համաձայն՝ Swift Beat-ը կընդլայնի արտադրությունը, իսկ անօդաչու թռչող սարքերի մատակարարումները ուկրաինական բանակին կիրականացվեն առաջնահերթության հիմունքներով և արժեքով։