ԱՄՆ-ում 19-ամյա աղջիկը մահացել է սոցցանցերի թրենդի պատճառով՝ քիմիկատներ շնչելով

ԱՄՆ-ում Արիզոնայից Ռենա Օ'Ռուրկը մահացել է՝ մասնակցելով Dusting վտանգավոր ինտերնետային մարտահրավերին։ Նա արել է նույնը, ինչ իրենից առաջ արել են բազմաթիվ դեռահասներ մի քանի լայքի համար. նա շնչել է քիմիական գոլորշիներ՝ թմրանյութային արբեցման վիճակ զգալու համար, հայտնում է Bild-ը։

Դրա համար նա օգտագործել է ստեղնաշարի մաքրման միջոց, որը հոտ չունի և այդ պատճառով անվնաս էր թվում, սակայն 19-ամյա աղջկա մոտ սրտի կանգ է տեղի ունեցել, ինչից հետո նրան տեղափոխել են հիվանդանոց։ Մեկ շաբաթ նա անգիտակից վիճակում անցկացրել է վերակենդանացման բաժանմունքում, որից հետո բժիշկներն արձանագրել են ուղեղի մահը։

«Նա միշտ ասում էր. «Ես հայտնի եմ դառնալու, հայրի՛կ։ Պարզապես նայիր։ Ես անպայման հայտնի եմ դառնալու»։ Ցավոք, դա տեղի ունեցավ ոչ լավագույն հանգամանքներում»,- AZ Family հեռուստաալիքին պատմել է սգացող հայրը՝ Աարոն Օ'Ռուրկը։

Ի՞նչ է Dusting-ը (կամ Chroming-ը)։ Սա կենցաղային քիմիայի մեջ պարունակվող նյութերի ներշնչման պրակտիկա է՝ ներառյալ, օրինակ, աերոզոլային բալոններով ներկերը, լաքահան հեղուկը և մաքրող այլ միջոցներ։ Ազդեցությունն արագ է լինում. առաջանում է էյֆորիայի, «կայֆի» զգացողություն։ Սակայն վնասը կարող է լինել անդառնալի և մահացու։

news.am