Ռուսաստանի ԶՈՒ ԳՇ նախկին պետի տեղակալը դատապարտվել է 17 տարվա ազատազրկման՝ կաշառակերության և խարդախության համար

Ռուսաստանի զինված ուժերի գլխավոր շտաբի նախկին պետի տեղակալ Խալիլ Արսլանովը դատապարտվել է 17 տարվա ազատազրկման՝ կաշառակերության և խարդախության համար: 

«Դատարանը Արսլանով Խ. Ա.-ին մեղավոր է ճանաչել Ռուսաստանի Դաշնության քրեական օրենսգրքի 159-րդ հոդվածի 4-րդ մասով (առանձնապես խոշոր չափի խարդախություն), Ռուսաստանի Դաշնության քրեական օրենսգրքի 290-րդ հոդվածի 6-րդ մասով (առանձնապես խոշոր չափի կաշառք ստանալը) և դատապարտել է 17 տարվա ազատազրկման խիստ ռեժիմի ուղղիչ գաղութում», - նշվում է դատավճռում։

Արսլանովը նաև դատապարտվել է կաշառքի կրկնակի չափի տուգանքի, որը կազմել է ավելի քան 24 միլիոն ռուբլի։

Արսլանովից բացի, գործում ներգրավված են նաև Ռուսաստանի զինված ուժերի կառավարման համակարգի տեխնիկական հիմքերի կատարելագործման հրամանների բաժնի նախկին պետ, գնդապետ Պավել Կուտախովը և զինվորական թոշակառու Իգոր Յակովլևը։ Դատարանը նրանց մեղավոր է ճանաչել առանձնապես խոշոր չափերի խարդախության մեջ և դատապարտել համապատասխանաբար 7 և 6 տարվա ազատազրկման։ Երկուսն էլ կալանավորվել են հենց դատարանի դահլիճում։