Ադրբեջանի խորհրդարանը հաստատել է Սահմանադրության փոփոխությունները

Ադրբեջանի խորհրդարանը հաստատել է «Նախիջևանի Ինքնավար Հանրապետության Սահմանադրության փոփոխությունները հաստատելու մասին» սահմանադրական օրենքի նախագիծը: Հաղորդում է Media.az-ը։

«Գործող օրենսդրությամբ Նախիջևանի ինքնավարության հիմքերը դրվել են 1921 թվականի մարտի 16-ի Մոսկվայի և 1921 թվականի հոկտեմբերի 13-ի Կարսի միջազգային պայմանագրերով։ Փաստաթղթում ընդգծվում է, որ Նախիջևանը Ադրբեջանի Հանրապետության անբաժանելի մասն է։ Նախիջևանի Ինքնավար Հանրապետության Սահմանադրության հիմքը կազմում են 1991թ. օգոստոսի 30-ի «Ադրբեջանի Հանրապետության պետական անկախության վերականգնման մասին» հռչակագրում, 1991թ. հոկտեմբերի 18-ի «Ադրբեջանի Հանրապետության պետական անկախության մասին» Սահմանադրական ակտում և 1995թ. նոյեմբերի 12-ի համաժողովրդական քվեարկության՝ հանրաքվեի ժամանակ ընդունված Ադրբեջանի Սահմանադրության սկզբունքները:

Բացի այդ, Նախիջևանի Ինքնավար Հանրապետության Գերագույն մեջլիսի նախագահն այլևս չի համարվի ինքնավարության բարձրագույն պաշտոնյա: Առաջարկվում է նաև փոխել Գերագույն մեջլիսի ընտրությունների նշանակման կարգը: Գործող օրենսդրությամբ Ինքնավար Հանրապետության Գերագույն մեջլիսի ընտրությունները նշանակում է Նախիջևանի Գերագույն մեջլիսի նախագահը: Սակայն փաստաթղթում ընդգծվում է, որ Գերագույն մեջլիսի ընտրությունները նշանակելու է Ադրբեջանի նախագահը՝ Նախիջևանի Ինքնավար Հանրապետության Գերագույն մեջլիսի նախագահի առաջարկությունների հիման վրա»: