Բանակում նվազել են հանցագործությունները

Այսօր՝ լրագրողների հետ հանդիպման ժամանակ, ՀՀ գլխավոր զինվորական դատախազ Գևորգ Կոստանյանն ամփոփեց անցած տարին թվերով և փաստերով։

Զինդատախազի ներկայացրած տվյալներով՝ 2011 թ. ՀՀ զինված ուժերում մահվան էլքով դեպքերը նվազել են մոտ 33 տոկոսով, իսկ սպանությունների թիվն ավելի կտրուկ նվազում է արձանագրել՝ շուրջ 80 տոկոս։ Այս տարի բանակում արձանագրվել է մահվան 36 դեպք, որոնցից 30-ը` հանցագործության հետևանքով։ Այդ դեպքերից 10-ը տեղի են ունեցել հակառակորդի կողմից կատարված հանցագործությունների հետևանքով։

Ծառայություն անցնելու հետ կապված սպանությունները 2010 թվականի 17 դեպքի համեմատությամբ եղել են 2-ը։ Հիվանդությունների հետևանքով մահվան երեք դեպք է արձանագրվել՝ 2010 թվականի տասը դեպքի դիմաց։

«Այս ցուցանիշերի նվազման տեմպերը դեռևս գոհացուցիչ չեն, սակայն ցույց են տալիս նկատելի առաջընթաց և բարելավումներ։ Աշխատում ենք ստեղծել այնպիսի համակարգ, որը կնվազեցնի հանցավորությունն ընդհանրապես։ Հանցավորության ցուցանիշը նվազել է տասը տոկոսով, ինչը փաստում է, որ դեռևս շատ անելիք ունենք, ի դեպ՝ հասարակության բոլոր բնագավառներում»,- ասաց Կոստանյանը։

Պաշտպանության նախարարության և զինդատախազության կողմից իրականացվող համակարգային բնույթի միջոցառումները հանգեցնելու են ցանկալի արդյունքի. այս համոզվածությունը հայտնեց Կոստանյանը՝ նշելով, որ ՊՆ ձեռնարկումները գուցե առաջին հայացքից այդքան արդյունավետ չեն թվում, բայց երկարաժամկետ և համակարգային փոփոխությունների են հանգեցնելու։

Կոստանյանը կարևորեց նաև անցյալ տարվա սեպտեմբեր-հոկտեմբեր ամիսներից ՀՀ պաշտպանության նախարարի և ՀՀ զինվորական դատախազի կողմից նախաձեռնված ՀՀ ԶՈՒ Կարգապահական կանոնագրքի և ՀՀ Քրեական օրենսգրքի՝ զինվորական ծառայության կարգի դեմ ուղղված հանցագործությունների գլխում փոփոխություններ կատարելու գործընթացը։ Զինդատախազը նշեց, որ փոփոխություններն արդեն արված են և շուտով կներկայացվեն հանրությանը՝ ելնելով ոլորտի հրատապությունից։