Ուկրաինան գոյություն չէր ունենա, եթե 90-ականներին չհրաժարվեր միջուկային զենքից․ ԱԷՄԳ-ի գլխավոր տնօրեն

Ուկրաինան, որպես անկախ պետություն, գոյություն չէր ունենա, եթե 1990-ականներին չհրաժարվեր միջուկային զենքից։ Այս մասին հայտարարել է ԱԷՄԳ-ի գլխավոր տնօրեն Ռաֆայել Գրոսսին լեհական Rzeczpospolita հրատարակությանը տված հարցազրույցում։

Գրոսսին հիշեցրել է, որ 1991 թվականին՝ անկախություն ձեռք բերելու պահին, Ուկրաինան ուներ աշխարհում երրորդ ամենամեծ միջուկային զինանոցը։ Երեք տարի անց ուկրաինական միջուկային զենքը փոխանցվեց Ռուսաստանին։

Բացի այդ, այդ ժամանակ Ռուսաստանի Դաշնության և Միացյալ Նահանգների միջև արդեն ստորագրվել էր համաձայնագիր, ըստ որի՝ խորհրդային միջուկային զինանոցը պետք է փոխանցվեր ռուսներին։

«Այդ պատճառով՝ միջազգային հանրությունը թույլ չէր տա Ուկրաինային գոյություն ունենալ՝ որպես անկախ պետություն, եթե այն հրաժարվեր իր միջուկային զենքը Ռուսաստանին հանձնելուց»,-նշել է ԱԷՄԳ-ի ղեկավարը։