ԵՄ-ը փորձում է խուսափել Թրամփի ավտոտուրքից

Եվրոպական Միությունը ԱՄՆ-ի հետ արագ տեմպերով բանակցում է, որպեսզի մինչև օգոստոսի 1-ը հասնի առևտրային համաձայնության նախապատրաստմանը։ Թիրախում է ավտոմեքենաների ոլորտը, որտեղ ԵՄ-ն փորձում է մեղմել ապրիլից ուժի մեջ մտած 25% մաքսատուրքերը։ Անդրադարձ է կատարվում նաև ներմուծման քվոտաների և արտահանման դիմաց կրեդիտների ներդրմանը, ինչը թույլ կտա ԵՄ ավտոարտադրողներին՝ ինչպիսին են BMW-ն ու Mercedes-Benz-ը, մասամբ ազատվել մաքսային բեռից՝ ԱՄՆ-ում տեղական արտադրության հաշվին։

ԱՄՆ-ի առաջարկած մեխանիզմը ներառում է արտահանման արժեքի դիմաց ներմուծման առավելություններ՝ հնարավոր դարձնելով որոշ քանակությամբ մեքենաների մաքսազերծում կամ ցածր մաքսատուրքով ներմուծում։ Սակայն քննարկումները բարդ են՝ հատկապես քանի որ Volkswagen-ը դեռ չունի մեծ արտահանման պատմություն ԱՄՆ-ից, բայց քննարկում է նոր գործարան ստեղծելու հնարավորությունը Audi-ի համար։ Բրյուսելը փորձում է ապահովել նման պայմաններ, որոնք ընդունելի կլինեն ինչպես եվրոպացի արտադրողների, այնպես էլ Թրամփի վարչակազմի համար։

Անցյալ տարի ԵՄ-ն ԱՄՆ է արտահանել գրեթե 758,000 մեքենա՝ 38.9 միլիարդ եվրո արժողությամբ՝ չորս անգամ ավելի, քան ԱՄՆ-ից դեպի Եվրոպա։ ԵՄ-ն առաջարկել է նման մոդել, ինչն արդեն ընդունվել է Մեծ Բրիտանիայի դեպքում՝ տարեկան 100,000 մեքենայի մաքսազերծ քվոտայով։ Բայց Թրամփի վարչակազմը չի շտապում ընդունել նման մոտեցում։ Քննարկվում է նաև մաքսատուրքերի փոխադարձ նվազեցում՝ ԱՄՆ-ի 27.5%-ից և ԵՄ-ի 10%-ից։ ԵՄ-ն առաջարկում է նաև կարգավորումների ստանդարտացում, մասնավորապես՝ անվտանգության փորձարկումների ոլորտում, հայտնում է Reuters-ը։