Նախկին պատգամավորին դատապարտել են 7 տարվա ազատազրկման՝ ռեստորանի հրկիզման համար

Ռուսաստանի Յարոսլավլ քաղաքի Կիրովի շրջանային դատարանը յոթ տարվա ընդհանուր ռեժիմի ազատազրկման է դատապարտել նախկին քաղաքային պատգամավոր Դմիտրի Սոկոլովին՝ «Սկվեր» ռեստորանի դիտավորյալ հրկիզման համար, երբ ներսում մարդիկ են եղել։

Դատախազությունը մեղադրանքը ներկայացրել էր միաժամանակ երկու հոդվածով՝ գույքի դիտավորյալ վնասում հրկիզմամբ և ծանր մարմնական վնասվածքի պատճառում՝ հասարակության համար վտանգավոր և դաժան ձևով։ Սոկոլովը հրկիզել է ռեստորանի բացօթյա տաղավարը՝ գիտակցելով, որ ներսում այցելուներ կան։ Արդյունքում մի կին ստացել է ծանր այրվածքներ, գրում է Лента.ру-ն։

Հրկիզումը, ըստ Սոկոլովի փաստաբանի, տեղի է ունեցել կենցաղային հակամարտության ֆոնին․ նրա մայրը, որը ղեկավարում էր բնակիչների ՏՍԺ-ն, դեմ է եղել ռեստորանի տարածքում նոր շենք կառուցելու նախաձեռնությանը։ Դատախազությունը պահանջել էր 10 տարվա պատիժ, սակայն դատարանը սահմանել է 7։