Բրիտանական Land Rover-ները կարող են փոխարինվել կորեական Humvee-ով

Հարավային Կորեայի Kia ընկերությունը պատրաստվում է առաջարկել իր KLTV մարտավարական ավտոմեքենան՝ որպես բրիտանական բանակի Land Rover Defender-ների փոխարինում։ Այս մասին հայտնում է Defence Blog-ը։

Լոնդոնն արդեն հրավիրել է Kia-ին և մի շարք այլ արտադրողների մասնակցել $1,1 միլիարդ արժողությամբ ծրագրին, որի շրջանակում մինչև 2033 թվականը պլանավորվում է ձեռք բերել 1400 նոր մեքենա՝ 12 տարբեր կոնֆիգուրացիայով։ KLTV-ն հաճախ համեմատվում է ամերիկյան Humvee-ի հետ՝ արտաքին նմանության պատճառով։ Ավտոմեքենան հիմնված է Mohave քաղաքացիական մոդելի վրա, ունի ամրացված կառուցվածք և առաջարկվում է նաև զրահապատ տարբերակով, որը կեսից էլ ավելի էժան է Humvee-ից։

KLTV-ի շարժիչը համարվում է 20%-ով ավելի հզոր, ինչը ևս այն դարձնում է մրցունակ։ Նոր մեքենաների մրցույթին կմիանան նաև Land Rover, Jeep և Volkswagen ընկերությունները։

Նշենք, որ Ֆրանսիայի բանակը արդեն սկսել է ստանալ Serval զրահապատ մեքենաների նոր խմբաքանակը՝ հակադրոնային համակարգերով զինված։