ԱՄՆ մաքսատուրքերի ճնշման տակ՝ Korean Air-ի բեռնափոխադրումների եկամուտը նվազել է

Korean Air-ը՝ Հարավային Կորեայի խոշորագույն ավիաընկերությունը, երկրորդ եռամսյակում արձանագրել է բեռնափոխադրումների եկամտի 4% անկում՝ ԱՄՆ մաքսատուրքերի փոփոխական քաղաքականության պատճառով։ Ընկերությունը, որը վերջին տարիներին օգուտ էր քաղում Չինաստանից աճող էլեկտրոնային առևտրի ծավալներից, այժմ բախվում է շուկայի անկայունության հետ։

Ապրիլ-մայիսին ԱՄՆ-ն վերացրեց չինական փոքր արժեք ունեցող ապրանքների առանց հարկի ներմուծման արտոնությունը, ինչի արդյունքում Ասիայից դեպի ԱՄՆ օդային առաքումները զգալիորեն նվազեցին։ Korean Air-ը հայտնել է, որ փորձել է մեղմել իրավիճակը՝ կենտրոնանալով բարձր եկամտաբեր բեռների վրա, ինչպիսիք են միկրոչիպերը, մարտկոցները, արևային վահանակները և սեզոնային սննդամթերքը։

Ընկերության ընդհանուր եռամսյակային եկամուտը կազմել է մոտ 4 տրիլիոն վոն (2.9 մլրդ դոլար), սակայն շահույթը նվազել է 3.5%-ով՝ չնայած վառելիքի գների անկմանը։ Պատճառը՝ աճող աշխատավարձերն ու ամորտիզացիոն ծախսերը, գրում է Reuters-ը։