Չինական նահանգը թույլատրում է պաշտոնյաներին կողմնակի աշխատանք՝ վարձատրության անկման ֆոնին

Չինաստանի հարավում գտնվող Հունան նահանգը հայտարարել է, որ պետական ծառայողներին թույլ է տրվում ունենալ կողմնակի աշխատանքներ, եթե դրանք չեն խանգարում հիմնական գործառույթներին։ Թույլատրելի են նույնիսկ սննդի առաքում, վեպերի հեղինակում, մարզչական դասընթացներ կամ գյուղմթերքի վաճառք՝ պայմանով, որ չկա շահերի բախում և ղեկավարը տեղեկացված է։

Տնտեսական դանդաղման պայմաններում Չինաստանում պետական աշխատողների աշխատավարձերն ու բոնուսները կրճատվում են, իսկ որոշ նահանգներում նույնիսկ ամիսներով չեն վճարվել։ Ներկայիս նախաձեռնությունը՝ որն արձանագրվել է Հունան նահանգի պաշտոնական լրատվամիջոցներում, փորձում է մեղմել պետական համակարգում ֆինանսական ճնշումները։ Միևնույն ժամանակ, իշխանությունները զգուշացնում են՝ պետական ռեսուրսներն օգտագործել եկամուտ ստանալու նպատակով խստիվ արգելվում է, գրում է Reuters-ը։

Երկրում աճող գործազրկության ֆոնին Չինաստանի կառավարությունը նոր քայլեր է նախաձեռնել աշխատաշուկայի կայունացման ուղղությամբ։ Նախագահ Սի Ցզինպինը վերջերս հայտարարել է, որ երկրի առաջնային նպատակը պետք է լինի աշխատատեղերի, բիզնեսի և սպասումների կայունացումը։ Պեկինը նաև ներկայացրել է նոր միջոցառումներ՝ ներառյալ սոցիալական ապահովագրական աջակցություն և հատուկ վարկեր։