Յուրաքանչյուր երրորդ ՌԴ քաղաքացի չի կարող իրեն թույլ տալ անհրաժեշտ դեղորայք

Ռուսաստանում յուրաքանչյուր երրորդ քաղաքացի հայտնել է, որ չի կարող գնել իրեն անհրաժեշտ դեղերը։ Այս մասին վկայում են ՌԱՆԽԻԳՍ-ի սոցիալական վերլուծության և կանխատեսման ինստիտուտի կատարած ուսումնասիրության տվյալները, որոնց վրա հղում է անում Forbes-ը։ Հարցումն անցկացվել է հեռախոսով՝ 2023-ի նոյեմբեր-դեկտեմբերին։

Պարզվել է, որ բնակչության 75 տոկոսը նկատել է դեղորայքի գների էական աճ, իսկ 34 տոկոսը՝ նշել է, որ անհրաժեշտ դեղերը տեխնիկապես հասանելի էին, սակայն ֆինանսապես՝ ոչ։ Առավել խոցելի են համարվել ցածր եկամուտ ունեցող ընտանիքները, որտեղ մեկ անձի բաժին ընկնող ամսական եկամուտը չի գերազանցում 15 հազար ռուբլին․ այդ խմբում 84 տոկոսը չի կարողացել ապահովել դեղորայքային կարիքները։

Վերլուծաբանները նշում են, որ դեղերի մատչելիությունը դարձել է համակարգային խնդիր՝ հատկապես տարեցների, գյուղաբնակների և ցածր եկամուտ ունեցող ընտանիքների համար։ «Նույնիսկ ամենապարզ դեղերն այսօր հազիվ են հանդիպում 200 ռուբլուց ցածր գնով», — ընդգծել է Ռուսաստանի հիվանդների միության ներկայացուցիչ Յանա Վլասովան։