Ռուսաստանում պետականացվել է խոշորագույն ոսկու արդյունահանողներից մեկի ակտիվները

Չելյաբինսկի դատարանը բավարարել է Գլխավոր դատախազության հայցը՝ փոխանցելով «Յուժուրալզոլոտո» հանքարդյունաբերական խմբի բաժնեմասերն ու մի շարք այլ ակտիվներ պետությանը։ Ակտիվները պատկանում էին միլիարդատեր, «Եդինայա Ռոսիյա» կուսակցության պատգամավոր Կոնստանտին Ստրուկովին։

Ըստ դատախազության՝ Ստրուկովը, օգտագործելով իր պաշտոնեական դիրքը, տարիներ շարունակ կուտակել է ակտիվներ, այդ թվում՝ պետական նշանակության ոսկու հանքավայրեր, որոնք ձևականորեն գրանցված էին հարազատների վրա։ Դրանց թվում է նաև նրա դուստրը՝ Շվեյցարիայի քաղաքացի Ալեքսանդրա Ստրուկովան։

Ստրուկովը վերահսկում էր «Յուժուրալզոլոտոն» դեռևս 1997 թվականից, իսկ վերջին տարիներին, ըստ իրավապահների, նա ոչ միայն մոնոպոլացրել էր Ուրալի ոսկու արդյունահանումը, այլև ապօրինի կերպով դուրս էր բերում շահույթները արտերկիր՝ ծախսելով դրանք շքեղ կյանքի վրա, գրում է  Лента.ру-ն ։