Ռուսաստանում կտրուկ նվազել է կորպորատիվ սնանկությունների թիվը՝ ավելի քան 30%-ով

2025 թվականի երկրորդ եռամսյակում Ռուսաստանում գրանցվել է 1,580 կորպորատիվ սնանկացում, ինչը 30,4 տոկոսով քիչ է նախորդ տարվա նույն ժամանակահատվածի համեմատ։ Այս մասին հայտնում է «Ինտերֆաքս»-ը՝ հղում անելով «Ֆեդռեսուրս» պետական ռեեստրին։

Տնտեսական զարգացման փոխնախարար Մաքսիմ Կոլեսնիկովը նշել է, որ իրավաբանական անձանց սնանկացման դեպքերը շարունակում են կայուն նվազել։ Նրա խոսքով՝ ընթացքի մեջ է սնանկության համակարգի համապարփակ բարեփոխում, որի նպատակը ակտիվների արագ վերադարձն է տնտեսություն՝ հնարավորության դեպքում, գրում է Лента.ру-ն։

«Ֆեդռեսուրսի» ղեկավար Ալեքսեյ Յուխնինը ենթադրել է, որ վարկատուներն այժմ զգուշանում են դիմել լուծարման գործընթացի, քանի որ նման դեպքերում միջոցների վերադարձի հավանականությունը ցածր է։ Միևնույն ժամանակ, օրենսդիրներն առաջարկում են խստացնել կանոնները՝ արգելելով բանկրոտ ճանաչվել նրանց, ովքեր շքեղության նպատակով են կուտակել վարկեր։