Ռուսաստանի իրավիճակը համեմատել են Warhammer խաղի ճգնաժամի հետ

Ռուսաստանի Կենտրոնական բանկի փոխնախագահ Վլադիմիր Չիստյուխինը համեմատել է երկրի տնտեսական իրավիճակը հայտնի Warhammer 40000 խաղի տիեզերքի ճգնաժամի հետ՝ ընդգծելով, որ խաղի աշխարհում ստեղծված կոլապսը «շատ ավելի ծանր է», քան այն, ինչ տեղի է ունենում Ռուսաստանում։ Նրա խոսքերը հնչել են ԿԲ-ի YouTube-ալիքում հրապարակված «Որտե՞ղ է նայում ԿԲ-ն» փոդքաստում։

«Warhammer 40000-ի տիեզերքում ստեղծված ճգնաժամը համեմատելի չէ Ռուսաստանի ներկա վիճակի հետ։ Բարեբախտաբար, այնտեղ չեն քննարկվում ֆինանսական կարգավորման, շուկաների զարգացման ու դրամավարկային քաղաքականության հարցեր», – ասել է Չիստյուխինը։

Warhammer 40000-ը հայտնի սեղանի խաղ է, որի հիման վրա ստեղծվել է ամբողջական մեդիաֆրենչայզ՝ համակարգչային խաղերով, գրքերով և կոմիքսներով։ Դրանում պատկերվում է ապագա գալակտիկայում անսահման պատերազմ՝ տարբեր քաղաքակրթությունների և միստիկ ուժերի միջև, գրում է Лента.ру-ն։