Ես չեմ դավաճանել և երբեք չեմ դավաճանի. Պրիգոժին

Ռուսական երաժշտական պրոդյուսեր Իոսիֆ Պրիգոժինը վստահեցրել է, որ երբեք չի դավաճանի Ռուսաստանի նախագահ Վլադիմիր Պուտինին։ The New York Times-ին տված հարցազրույցում նա բացահայտել է, որ Կանադան իրեն առաջարկել է հրաժարվել պատժամիջոցներից, եթե հրապարակայնորեն քննադատի ռուսական իշխանություններին՝ հաստատելով խոսակցությունների արտահոսքի բովանդակությունը, որտեղ իրեն վերագրվող ձայնը կասկածի տակ է դնում «հատուկ ռազմական գործողության» ճիշտությունը։

Պրիգոժինը պատմել է, որ Կանադայի կառավարությունն իրեն ուղարկել է նամակ, որտեղ մեղադրել է նրան ռուսական «դեզինֆորմացիան» տարածելու մեջ և նշել է, որ նա կարող էր խուսափել պատժամիջոցներից՝ փոփոխելով դիրքորոշումը։ Նա շեշտել է, որ սա սակարկություն է պետական մակարդակով։ «Ես չեմ դավաճանել և երբեք չեմ դավաճանի», — ասել է նա։

Պրիգոժինի և նրա կնոջ՝ երգչուհի Վալերիայի դեմ Կանադան կիրառել է պատժամիջոցներ՝ «իրենց արվեստը ռուսական ներխուժման քարոզչության համար օգտագործելու» պատճառաբանությամբ։