Նոր մանրամասներ են հայտնի դարձել Ուկրաինայում մահացած բրիտանացի վարձկան Ջորդան Չեդվիկի գործով

Բրիտանական The Daily Telegraph-ը բացահայտել է նոր տվյալներ 2023-ին Ուկրաինայում մահացած բրիտանացի վարձկան Ջորդան Չեդվիկի մահվան շուրջ։ Նրա մարմինը գտնվել էր ջրավազանում՝ ձեռքերը հետևում կապված։ Պարզվել է, որ մահվանից առաջ Չեդվիկը վիճել էր մեկ այլ բրիտանացի վարձկանի՝ «Բրոնկո» մականունով մարտիկի հետ։

Վիճաբանությունը տեղի է ունեցել «50/50» անունով գաղտնի ստորաբաժանումում՝ Ուկրաինայի ռազմական հետախուզությանը կցված։ Ըստ աղբյուրների՝ Չեդվիկը գիշերով ամբողջությամբ զինված փորձել է սպանել «Բրոնկոյին», ինչից հետո նրան վնասազերծել, կապել և տեղափոխել են անհայտ ուղղությամբ։ Մեկ-երկու օր անց նրա մարմինը հայտնաբերվել է ջրավազանում։

Դեպքի պահին տանը եղել են նաև ամերիկացի, դանիացի և երեք բրիտանացի մարտիկներ։ Նրանց բոլորին ոստիկանությունը կարճ ժամանակով բերման է ենթարկել և հարցաքննել, սակայն ապացույցների բացակայության պատճառով ազատ են արձակել։ Հետագայում ԴՆԹ փորձաքննությունն ու ստուգումը պոլիգրաֆով արդարացրել են նրանց։

Համածառայակիցները ենթադրել են, որ Չեդվիկին հնարավոր է ջրով տանջել են՝ հաշվի առնելով, որ նրա թոքերում հայտնաբերված ջուրը չէր համապատասխանում այն վայրին, որտեղ գտնվել էր մարմինը։