Լավրովը՝ Կիմ Չեն Ընի զբոսանավում, հումորներ, ուղերձներ և Վոնսանի գովազդ

Ռուսաստանի արտգործնախարար Սերգեյ Լավրովը Հյուսիսային Կորեայում հանդիպել է Կիմ Չեն Ընի հետ վերջինիս շքեղ զբոսանավում՝ Վոնսան քաղաքում բացված նոր առողջարանային գոտում։ Նրանք ջերմ ողջունել են միմյանց, ապա Լավրովը կատակել է՝ նշելով, որ իրենք դեռ չեն թողել ծխելը. «Դուք դեռ ծխո՞ւմ եք։ Ես էլ եմ ծխում», — հեգնանքով ասել է նա։

Հանդիպման ընթացքում Լավրովը Կիմին է փոխանցել Ռուսաստանի նախագահ Վլադիմիր Պուտինի «շատ ջերմ ողջույնները» և ընդգծել, որ Մոսկվան հավատարիմ է նախկինում ձեռք բերված բոլոր պայմանավորվածություններին։ Նա նաև հիշեցրել է՝ ինչպես մայիսի 9-ի շքերթի ժամանակ Պուտինը շփվել է ԿԺԴՀ-ի այն սպաների հետ, ովքեր ժամանակին մասնակցել են Կուրսկի շրջանի ազատագրմանը։

Վիզիտի շրջանակում Լավրովը հանդիպել է նաև Հյուսիսային Կորեայի արտգործնախարար Չոյ Սոն Հուիի հետ։ Նրանք քննարկել են երկկողմ հարաբերությունների զարգացումը և տարածաշրջանային անվտանգությունը։ Երկուստեք նշել են՝ պետք է դիմակայել այն երկրներին, որոնք «սրում են լարվածությունը» և ձգտում են գերիշխանություն հաստատել։

Կիմ Չեն Ընի խոսքով՝ Լավրովը դարձել է Վոնսանի առողջարանի առաջին օտարերկրյա հյուրը։ Լավրովն էլ իր հերթին նշել է, որ հենց Ռուսաստանում ԿԺԴՀ-ի դեսպանի՝ Ալեքսանդր Մացեգորայի «գովազդի» շնորհիվ է որոշել այցելել։ Նախարարը առողջարանը համարել է գրավիչ և հարմար տեղ՝ ռուսաստանցիների համար ևս։